Se yonn nan pi bon e pi bel konsey yo te ka bay mwen nan sa ki genyen rapo ak fè biznis oubyen lanse yon aktivite kelkonk. Siw swiv byen sa kap pase deyo a, wap we fason anpil nan moun yo fe biznis jounen jodia, se yon bagay ki etranj, dwol, biza.
Si yo genyen yon biznis ki nan domèn konstriksyon, wap wè se yo menm ki ap kloure sesi, siye sela. Si yo genyen yon biznis nan milye transpò a, tankou taksi pa egzanp, wap we se yo menm menm ki ap kondi machin oubyen moto an. E si tout fwa yo ta genyen yon biznis fotografi oubyen videyografi, wap we se yo ki dèyè kamera an, se yo ki ap fè foto, travay foto, fè video, travay video. Se yon gwo bout tonton erè sa ye. Sa anpeche anpil moun avanse nan aktivite yo ap antreprann lan, paske yo limite tet yo nan sa yo ap fè an.
E siw pa vle rete yon senp anplwaye pou tout res laviw, menm si se avek tet ou selman wap travay, eseye chanje sa. Mwen ap pataje kek konsey avek ou, pouw konprann enpotans avek avantaj ki genyen le ou delege nan travay ou ap fè yo.
Saw ta dwe fè an premye epi tou senpleman, se angaje yon moun pou kondi taksi an pou ou lew genyen biznis taksi an.
Angaje yon moun pou fè foto ak videyo yo epi edite yo pou ou lew genyen yon biznis foto oubyen videographie. E se konsa wap genyen plis tan pouw jere andedan biznis ou nan nivo administratif, nan cheche kliyan, trouve plis kontak, siyen plis kontra, angaje plis anplwaye ki pi bon, achte plis materyel selon bezwen biznis lan, e menm yon lot machin oubyen moto pou fè taksi, si sa nan branch transpò ou ap evolye.
Se konsa wap rive kreye yon vrè business ki ap kapab travay pou ou menm le ou ap domi lakay ou oubyen menm le ou ap jere yon lot aktivite.
Poukisa mwen di ou sa?
Map baw egzanp klè ki baze sou pwop eksperyans mwen.
Mwen genyen Graphart Design depi 2013, mwen te yon senp dizaynè menm jan avek anpil lot ki deyo a. Mwen te konn jere ti kontra afich, lem jwenn, kek postè mizik lè yo fin negosye nenpot plis pase pi piti ke 50% nan premye m te bay lan.
Men se jis nan ane 2019 mwen resi konsidere travay mwen tankou yon vrai business.
Mwen rive transformer li an Graphart Design Agency, mwen envesti tan, eneji avek ekonomi e mwen ofri anpil sèvis ladan. Men eske se mwen menm sel ki fe tout travay yo? Non.
Mwen ofri sevis cartoon, sa nou rele ti komik lan, mwen pa konnen anyen nan cartoon.
Mwen ofri sevis création website, menm si mwen genyen kek nosyon de baz ladan, men se pa domaine mwen. Genyen yon moun ki fè sa.
Mwen ofri sevis enregistrement son, se pa domaine mwen toujou. Mwen genyen kolabarasyon avek yon moun pou sa.
Mwen ofri sevis enpresyon sou mayo, e se toujou sou menm liy lan, yon lot moun ki fè sa.
Chak sevis sa yo, se yon moun diferan ki ofri yo. Mwen pa fè tout travay mwen menm sel, e sa ede business mwen mache pi byen.
Nan Graphart Design Agency, mwen asirem de konsepsyon grafik yo avek fotografi. E kek fwa, menm kontra pou foto yo, mwen deplase avek lot moun. Sa vin pemet mwen prezante yon lot imaj ki pi pwofesyonel sou travay mwen. Mwen pi rapid le mwen ap bay sevis lan, e se konsa tou, mwen kapab aksepte plizye proje alafwa.
Ou pa oblije chita travay pou tet ou nan yon aktivite ou ap regle, delege nan responsabilite ou yo, negosye avek kek lot moun pou yo egzekite tel ou tel sevis pou ou selon tel ou tel kondisyon.
Depi ou vle, ou kapab.
Ou vle yon lot konsey? Abone ou paj mwen an.
Ekri nou sou WhatsApp nan +509.3612.5724 pou plis enfomasyon ou ta bezwen sou travay nou oubyen sou fason ou kapab devlope aktivite ou an pi byen. Konsey nou yo gratis.
Commentaires