Avan ou lanse ou nan kreyasyon antrepriz ou, genyen kèk fòmalite ou dwe respèkte pou ou kapab asire ou ke projè biznis sa ap kapab byen devlope epi rantre lajan. Biznis plan an se pi bon mwayen ou kapab asire ou pou sa rive. Se yon dokiman ki pral gennyen anpil valè pou antrepriz ou an paske se li ki pral bay antrepriz lan yon potansyel pou li rantre lajan e se li ki ap bay mwayen pou ou rive rantre lajan sa yo. Men rive mete yon biznis plan sou pye pa fasil, se yon travay ki long anpil epi li mande konesans, se pou sa anpil moun toujou fè tchèk a yon pwofesyonèl pou yo fè sa.
Kisa yon biznis plan ye ?
Yon biznis plan se yon prezantasyon ekri epi detaye ki la pou dekri projè antrepriz lan. Li dwe genyen anpil bagay ladan, men yo dwe bèl epi byen prepare jis pou ou kapab rive konvenk kèk fiti patnè ou yo. Oubyen menm kliyantèl ou. Anndedan yon biznis plan, ou dwe jwenn bagay sa yo :
ü Fòm jiridik antrepriz lan. Pandan ou tou ap presize aksyon sosyal yo, aksyonè yo epi syèj sosyal antrepriz lan. (Syèj sosyal lan vle di adrès lokal antrepriz lan)
ü Tip produit oubyen sèvis ou ap pwopoze yo.
ü Tip kliyantèl ou sible an.
ü Metod, mwayen ou pral itilize pou ou distribiye produit oubyen sevis ou yo. Avek kote ou pral distribiye produit oubyen sèvis ou yo.
ü Prensipal konkiran ou yo ki sou mache an. (Fòk ou pale de yo, dekri yo, pale de fòs ak feblès yo.)
ü Kalandriye etap lansman ak devlopman antrepriz lan ni fiti produit oubyen sèvis ou pral ofri yo.
ü Pwosesi fabrikasyon produit ou yo, san bliye pale de founisè ou yo avek teknoloji ou pral itilize pou fè sa.
ü Resous wap bezwen yo pou ou rive lanse biznis lan, san bliye pale de mwayen wap finanse projè an avek kantite lajan wap bezwen an.
ü Previzyon sou trezori biznis lan avek kont rezilta a.
Si nou tap defini biznis plan nan yon sèl fraz, nou tap di biznis plan an se yon dokiman ki regwoupe tout strateji antrepriz lan pral itilize pou li kapab fè lajan avek projè li an. Li reflete lide antreprenè an epi li dekri mwayen li ap bezwen yo pou li rive reyalize objektif li.
Karakteriskik yon biznis plan
Nòmalman, yon biznis plan se yon dokiman ki genyen 20 oubyen 30 paj epi li genyen andedan li tout enfomasyon ak analiz ki konsène projè an. Me kek karakteristik yon biznis plan dwe genyen :
ü Yon biznis plan dwe klè, nèt epi presi. Moun dwe kapab konprann li san difikilte. Menm si se yon projè teknik ou pral reyalize, e ki konplike pou fèt, men biznis plan ou an dwe fasil a konprann.
ü Li dwe konplè. Sa vle di ou dwe evite anyen paske sa ka koz yo rejte demand finansman projè ou an si tout fwa ou te genyen entansyon fè yon demand finansman.
ü Li dwe reyalis. Ou pa dwe kache aspè negatif a projè ou an. Yo toujou di ou reve gran, men rete reyalis. Se pa paske ou pa pale de kote negatif yo ki fè y opa egzite.
Prezantasyon yon biznis plan
Avan ou redije biznis plan ou an, ou dwe chèche konnen kritè rechèch ak validasyon lektè yo, sitou patnè ak envestisè yo. Dayè, chak dokiman posede patikilarite pa yo an fonksyon ak tip lektè yo ak projè a touu. Men an jeneral, me prensipal pati yon biznis plan dwe genyen :
ü Executive summary : se pati sa ki prezante rezime biznis plan oubyen plan dafè ou an. Ou fè executive summary an apre ou fin reyalize biznis plan an menm si se jis an premye ou pral plase li. Pati sa okipe yon plas enpotan nan biznis plan an paske objektif li se rive bay potansyel envèstisè ou yo anvi pou yo konnen plis de biznis oubyen projè ou an.
ü Partie redactionnelle : Se pati sa ki pral pèmèt lektè ou yo jwenn bon jan enfomasyon sou projè an. Se la ou pral vrèman prezante òf wap fè an avek strateji ou pral itilize pou ou rive atenn objektif ou yo. Ou pral pale de enpak projè an, avantaj ak dezavantaj projè an, produit yo, sèvis yo, tout bagay nèt.
ü Partie financière : Se pati sa ki pral konplete partie redactionnelle lan. Se yon prezantasyon kont rezilta previzyonel lan, bilan previzyonel lan, tablo rantre-soti trezori previzyonel lan, plan finansman ak ipotez yo.
Dabitid, yon biznis plan prezante aktivite antrepriz lan pou 3 lòt ane ki ap vini yo. Men vle de ou, ou kapab fè li pou mwens ane oubyen ou kapab modifye li nan wout pandan aktivite ou yo ap avanse epi ou ap posede plis lide.
Kòman pou ou redije yon biznis plan nan lòd
Ou ekri yon plan dafè oubyen yon biznis plan se pou ou demontre ke aktivite ou pral fè an kapab rantre lajan, se pou ou demontre ke aktivite ou an adapte a sa mache an bezwen an. Chak agiman dwe byen agimante pou ou mete projè a an valè. Balans ki pral genyen ant revni potansyel yo, opòtinite ak risk yo, moun ki ap finanse projè an pral byen gade bagay sa yo pou li kapab pran yon desizyon sou projè a.
Chak moun ki ap analize vizyon projè ou an pral gade li yon fason ki diferan. Tankou bankye avek mandjè yo, san bliye aksyonè yo. Yo chak wè yon bagay diferan. Pa egzanp, yon bankye pral fokis ou kapasite kapasite ou genyen pou ou ranbouse lajan ou pral prete yo, lap gade kapasite otofinansman ou avek aktif sosyete an posede. Tandiske aksyonè yo se rantabilite projè an yap gade sèlman. Yo bezwen konnen konbyen benefis yap fè. Se pou sa, ou dwe byen etidye griy analiz wap prezante an jis pou ou kapab adapte li a tout avantyalite.
Se menm bagay lan tou pou projè ou yo piske chak aktivite diferan de lòt. Biznis plan a yon restoran pa ka menm jan ak biznis plan a yon studio de beauté oubyen yon poulaye. Pa egzanp, kantite moun ak ekipman wap bezwen yo diferan pou tou le 3 aktivite sa yo. Se pou sa li enpòtan anpil pou ou fè yon pwofesyonèl ede ou pou ou kapab rive byen adapte biznis plan ou an ak tip projè ou ble reyalize an.
Pwosesis pou ou elabore yon biznis plan
Pou ou rive byen elabore yon biznis plan, genyen anpil bagay pou ou fè. Se pou rezon sa fè yon biznis plan koute lajan epi li mande pou ou genyen tan lib. Nou kapab rezime yo an 5 pati sèlman :
ü Etidye mache an : Se yon premye pa ki enpotan anpil. Paske tout moun pa genyen menm gou, y opa genyen menm bezwen. Kidonk produit oubyen sèvis yo dwe adapte a kliyantèl sib ou an. Se pou sa, li enpotan pou ou mache pran enfomasyon pou kapab wè ki bezwen yo genyen. Ann pran egzanp sou yon projè boulanje, ou kapab mennen yo ankèt sou teren an pou ou fè kek sondaj sou sa moun yo plis renmen, ki sa yo plis abitye manje epi ki kantite lajan yo genyen pou yo kapab. Pa bliye tou, yon bon anplasman enpotan anpil pou ou kapab pwomote aktivite ou, sitou si ou pral oblije vann egzakteman nan lokal ou an. Pou yon boulanje pa egzanp, li preferab pou ou mete lokal lan yon kote moun pase anpil.
ü Evalye konkirans lan : Tout jèn antreprenè yo dwe konnen li enpòtan anpil pou ou konnen ak kiyès ou an afè nan sa ki genyen awè avèk antrepriz ki déjà egziste yo. Sitou si yo fè menm aktivite avek ou. Nan demach sa, ou pral bezwen reponn a jan de kesyon sa yo : kiyès ki konkiran ou yo ? Ki strateji yo itilize ? Ki reyaksyon yo pral genyen fas a plan maketing ou pral itilize an ? Ou kapab menm chèche idantifye avantaj konkirans lan genyen sou ou. Sa ap pèmèt ou dejwe situation an epi adapte yon pi strateji.
ü Etabli yon strateji maketing : Yon bon biznisman dwe adopte yon strateji maketing selon eta mache an, selon kliyantèl li sible an epi selon konkirans lan. Souvan se strateji maketing ou an ki fè diferans lan lè kondisyon yo pa fasil oubyen konkirans lan tchak anpil. Ann pran egzanp yon restoran, souvan se kalite rapò-pri an ki fè diferans lan. Menm dekorasyon ak konfò kliyan yo jwenn anndan an konte tou.
ü Prezante yon eta previzyonel pou projè an : Eta previzyonel yo reprezante tablo finansye yo ki pral pèmèt ou fè yon rezime depans ak resous ou yo pou ou kapab estime benefis ou kapab fè pou chak produit oubyen sèvis. Demach sa a enpotan anpil si ou anvizaje fè yon levée de fonds paske se li ki jistifye bezwen finansman projè ou an.
ü Metrize fason wap grandi an : Ou dwe genyen posibilite pou ou imajine koman bagay yo pral ye pi devan. Etandone ou pran yon risk nan envesti nan biznis lan, ou dwe vize woe pi lwen nan benefis ou yo. Rantabilite a long terme lan se li ki objektif prensipal lan. Pa egzanp, pou yon patisri, ou kapab metriz kwasans li si ou varye kantite gato wap fè yo pandan wap ajoute kè nouvo gou. Ou ap fè tout sa nan entansyon pou ou rete pwodiktif epi respèkte rapò ki genyen ant kalite ak pri yo.
Paske tout aktivite pa menm, chak biznis plan dwe diferan. Ekri yon biznis plan pou yon projè kapab pi konplike pa yon lòt.
Avantaj a yon biznis plan.
Mwen patap fini atik lan san mwen pa prezante nou 3 pi gwo avantaj a yon biznis plan. Se vre, ekri yon biznis plan pran anpil tan. Men sa pa vle di travay sa pa vrèman enpòtan. Dokiman sa jwe yon gwo wòl nan avni projè an. Li pèmèt ni antreprenè an ni envestisè yo pwoteje tèt yo nan reyalizasyon lansman projè an, ni nan agrandisman projè a pi devan. Si pa egzanp ou ta anvi genyen yon apèsi sou aspè finansye a projè ou an, ou pa bezwen lòt bagay ke elabore yon biznis plan pou ou wè. Li genyen yon plan reyalis sou projè ou an nan yon fason pou pi byen konvèk envestisè avek patnè o yo. Me 3 pi gwo avantaj biznis plan an :
ü Biznis plan an pèmèt ou byen jere biznis lan. Menm si se yon ti biznis, sa nou rele PME an, degaje ou ekri yon biznis plan, sa ap pèmèt ou konnen si biznis ou an ka fè kòb.
ü Biznis plan an se yon dokiman yo egzije ou pou ou genyen pou tout finansman projè ou an. Menm si se pou yon levée de fonds oubyen yon emprunt labank.
ü Biznis plan an pèmèt ou evite risk yo. Depi ou di biznis, ou di risk. Antouka, depi ou genyen yon plan dafè nan men ou, ou ap konnen risk yo e ou ap konnen pwofi ou kapab reyalize yo. Li tou senpleman ede ou pran pi bon desizyon.
Dokiman sa dwe presi anpil. Anplis li obligatwa pou ou genyen dokiman sa si ou anvi al mande prete lajan labank oubyen envite yon lòt moun envèsti nan aktivite ou an.
____________________________________________________________
Ou genyen yon lide biznis ? Ou genyen yon biznis ki déjà ap fonksyone ? Nou kapab ede ou ekri yon biznis plan pou biznis ou an, pa ezite kontakte nou sou whatsapp nan +5093612-5724 pou nou fè yon chita pale.
Nou anvi ede ou !
Comments